منتديـــــــــات ابنـــــــــاء البزعــــــــــه
حبااااااااااااابكم عشــــره بلا كشره

منتديـــــــــات ابنـــــــــاء البزعــــــــــه

قال تعال: ((يَا أَيُّهَا النَّاسُ إِنَّا خَلَقْنَاكُمْ مِنْ ذَكَرٍ وَأُنْثَىٰ وَجَعَلْنَاكُمْ شُعُوبًا وَقَبَائِلَ لِتَعَارَفُوا ۚ إِنَّ أَكْرَمَكُمْ عِنْدَ اللَّهِ أَتْقَاكُمْ ۚ إِنَّ اللَّهَ عَلِيمٌ خَبِيرٌ ))
 
الرئيسيةالبوابةاليوميةمكتبة الصورس .و .جبحـثالأعضاءالمجموعاتالتسجيلدخول

شاطر | 
 

 اروع ماقاله شاعر البزعه احمد محمد عبدالرحمن قلباي في البل

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
Admin
Admin
avatar

عدد المساهمات : 17
تاريخ التسجيل : 09/11/2011
العمر : 33
الموقع : السودان / شمال كردفان/ام صيقعون الجاك

مُساهمةموضوع: اروع ماقاله شاعر البزعه احمد محمد عبدالرحمن قلباي في البل   الإثنين نوفمبر 21, 2011 4:09 pm

وكردفان الغرة أم خيرا جوه وبرة في محل مكين تقديرا وإعزازا

وهاك بدءا ما قاله شاعر كردفان البزعي أحمد محمد عبدالرحمن قلباي في ألبل:

ألْبِلْ دِيـۤل عَجِيبـَاتْ والبَعِيـدْ بِدْنَنَّـو

ألْبِـلْ دِيـۤلْ بُطَانْهِـنْ بالسَّفَـرْ بِمْغَنُّو

ألْبِـلْ دِيـۤل البِريدَنُّـو إنْ فَقِيرْ بِغْنَنُّو

ألْبِـلْ دِيۤلْ البِيَابَنُـو إنْ غَنِي بِفِقْرَنُّـو

***

ألْبـِـلْ دِيــۤلْ سِعَايــةْ القُـدَّرْ

ألْبِلْ دِيۤلَ سَمْحَاتْ إنْ هِيَاجْ وإنْ فُدَّرْ

ألْبِـلْ دِيۤلْ البِيسْعَاهِنْ حَلَفْ مَا وَدَّرْ

ألْبِـلْ دِيۤلْ لَحَمْهِنْ فِي الدُّولْ بِتْصَدَّرْ

***

ألْبِـلْ دِيۤلْ سَمْحَاتْ مِنْ فَحَلْ لِىۤ بَكْـرَه

ألْبِـلْ دِيۤلْ كَمْ حَلَّنْ مُضِيقْ مِنْ وَكْـرَه

ألْبِـلْ دِيۤلْ سَعَاهِنْ عِنْدُو أحْسَنْ مَسْرَه

ألْبِلْ دِيۤلْ بُطُونْهِنْ بالنَهِيـضْ مِنْكَسْرَه

***

ألْبِـــلْ دِيــۤلْ دَرِبـْهِنْ قَاسِــي

ألْبِلْ دِيۤلْ مَشِيهِنْ فِي الأرِضْ مُتْواسِي

ألْبِلْ دِيـۤلْ مَـا بِسْعَاهِـنْ المَرَّاسِـي

ألْبِلْ دِيۤلْ وَبَرْهِـنْ فِي الصَّقَايعْ كَاسِي

***

ألْبـِـل دِيــۤلْ فُرَاقِـنْ شِيــۤـنْ

ألْبِـلْ دِيۤلْ رَوَاحِلْ فِي الرِّمَالْ والطَّينْ

ألْبِـلْ دِيۤلْ كَمْ دَمَرَنْ سُرُوجْ وَاحْدِينْ

ألْبِـلْ دِيۤلْ وَلَدْهِنْ دِيمَه فِكْرُو دَهِيـنْ

***



ألْبِـلْ والبَنَـاتْ والتَّالِـتْ النَّقْدِيَّـة

إنْ إتْجَاوَزَنْ لِيۤكْ تَانِي مَافِي قَضِيَّـة

الغُنَـا والنَّمِيـمْ وأمْثَالْ عَرَبْنَا الحَيَّه

فِيهِنْ هِـنْ والمُـوۤتْ فِيهِنْ اجْبَاريَّة

***

ألْبِلْ والبَنَاتْ والتَّالتَّـه جَمْع المَـالْ

إنْ إتْجَاوَزَنْ لِيـۤكْ تَانِي مَافِي إشْكَالْ

الغُنَـا والنَّمِيـمْ ؤتضِـرِّبْ الأمْثَـالْ

فِيهِنْ هِنْ والمُوۤتْ فِي التَّلاتَـه حَلالْ

***

مَرْضَانْ البَنَاتْ مَا أظِنُّو ينْصَحْ يِطِيبْ

ؤمَرْضَانْ الإبِلْ فِي مَاصِعِـنْ رِكِّيـبْ

جَقْلَه عَقِيدْهَا صِنْدِيدْ فَارِسَاً شَنَحيۤـبْ

ؤأمْ خَدْ تَكْرَه العِيفَه وخَفِيـفْ الجِيۤبْ

***

ألْبِـلْ بالسَّفَـرْ ذَاكِرْهِـنْ القَيَّــومْ

لابْهَابـَنْ صَحَاري لابـَرِد لا سَمُـومْ

هَاكْعَـات العَرَاقِيـبْ فِيـهَا فَرِّشْ نُومْ

ؤعَالياتْ الشَنَاشِينْ فِي رَحِيلْهَا بَلُوۤم

***

ألْبِـلْ فِيهَـا جَلَّـتْ قُـدْرَة الله الحَي

دَنَّاياتْ بَعيـدْ سَاعْة الضَّـلامْ والضَّي

هَاكْعَـاتْ العَرَاقِيــبْ رَفَّهِـنْ كُونْدَي

ؤعَالياتْ الشَّنَاشِينْ بِطْوَنْ الأرْضْ طَي

***

ألْبِلْ خِلْقَتِـنْ مَذْكُـورَه فِي الآيـاتْ

دَنَّايَاتْ صَحاري الصَّي بِدُونْ يَايَـاتْ

هَاكْعَاتْ العَرَاقِيبْ فِي السَّفَرْ رَاحَـاتْ

ؤعَالْيَاتْ الشَّنَاشِينْ بِطْـوَنْ الفَرَقَاتْ

***

ألْبِلْ خِلْقَتِنْ مَذْكُـورَه فِي القُـرْآنْ

دَنَّايَاتْ صَحَـارِي تْهَوِّلْ النِّيسَـانْ

هَاكْعَاتْ العَرَاقِيـبْ مَرْوَحَه وهَبَبَانْ

عَالياتْ الشَنَاشِينْ بِطـوَّنْ القِيزَانْ

***

ألْبِلْ خِلْقَتِـنْ ذَاكِـرْهَا رَبّ الكُـوۤنْ

دَنَّاياتْ صَحَارِي الصَّي بِدُونْ طَبْلُوۤنْ

هَاكْعَـاتْ العَرَاقِيـبْ رَفَّهِـنْ بَنْطُوۤنْ

عَالْيَـاتْ الشَّنَاشِيـنْ سُرْعَتِنْ تَلَفُوۤنْ

***

ألْبِلْ والبَنَـاتْ عِيشْتَنْ بَرَاهِـنْ شِيـۤنَه

والبِخَتَاهِـنْ أسْفَانَـاً يِعَضِّـي إيديۤنَـه

أبْ حُنْجُورْ بِعَجْبَكْ يُوۤمْ تَخُشْ بِى الزِّينَه

وأُمْ طُـوۤقْ بَسْمَتَه بِالّليۤلْ تَضَوِّي رَتِينَه

***



ألْبِلْ والبَنَـاتْ عِيشْتـَنْ بَرَاهِنْ مُـرَّه

والبِخَتَاهِـنْ أسْفَانَـاً مَحَيَّـرْ ؤطُـرَّه

أبْ حُنجُورْ بِعَجْبَك يُومْ تَحَدْف الحُـرَّه

وأُمْ طُوۤق بَسْمَتَه بِتزِيدْ قُلُوبْنَا مَسَـرَّه

***

ألْبِلْ والبَنَاتْ عِيشْتَـنْ بَرَاهِـنْ مُـوۤتْ

والبِخَتـَاهِـنْ أسْفَانَـاً مَحَيـَّرْ يُـوۤتْ

أبْ حُنْجُـورْ سَمِـحْ يُوۤم لَمَّـة البَنُّوتْ

وأمْ طُوۤقْ تَفِرحْ الحَزْنَانْ يِكُونْ مَبْسُوطْ

***

ألْبِـلْ والبَنـَـاتْ زُوۤل مِنَّهِـنْ مَا بْتُـوبْ

والَبابَاهَـا يَـازُوۤلْ شُـومْ ؤيَا فِي عِيُـوبْ

أبْ حُنْجُورْ يِجِيـكْ فِي مَشِيـهُو كالأشْبـُوبْ

وأمْ طُوۤقْ سَمْحَه يُوۤمْ تَجِي قَادْلَه لابْسَه التُّوۤبْ

***

ألْبِلْ دِيۤلْ سِعَايَة أهَلْ الفَخُـرْ آبْنَيَّـه

ألْبِلْ دِيـۤلْ لَبَنْهِـنْ يِبَـرِّدْ النَّارِيَّـه

ألْبِلْ دِيـۤلْ وَلَدْهِنْ مَا بِهَـابْ الدَّيَّـه

ألْبِلْ دِيـۤلْ كَـمْ كَـمْ جَابَنْ النَّقْدِيَّـه

***

ألْبِـلْ دِيۤلْ وصِفْهِنْ يِحَيِّـرْ الغَنَّاي

ألْبِلْ دِيۤلْ عَقِيدْتِّنْ مِنُّو بَاخْدُو الرَّاي

ألْبِـل دِيـۤلْ لَبَنْهِنْ يِسَكِّـتْ البَكَّاي

ألْبِلْ دِيـۤلْ سَريۤـبِنْ بِعْجِبْ السَّعَّاي

***

ألْبِلْ دِيۤلْ مَا سْعَايَة دَنِي وسَجْمَـانْ

ألبل ديۤل ماركبهن عوير وجبـانْ

ألبل ديـۤل كم كـم فرّقن أخـوانْ

ألْبِلْ دِيۤـلْ أصِيلْهِن بِسْبُقْ النَِِّيسََانْ

***

ألْبِلْ دِيۤلْ أصَالَة الفَخَر هِيلْهِـن جُمْلَـه

ألْبِلْ دِيۤلْ مَا سْعَايَـة إضِيۤنـه وخَمْلَـه

ألْبِلْ دِيۤلْ سَفَاينْ فِي الشِّقُوقْ والرَّمْلَـه

ألْبِلْ دِيۤـلْ فَارِسْهِـنْ بِقُـودْ الحَمْلَـه

***

ألْبِـلْ دِيـۤـلْ بَغَنِّــي عَلِيۤـهِنْ

بَشَكِّرْهِنْ بَرِيد وَلَدَاً بِسَافِـرْ بِيۤهِنْ

الـدَّمْ بِكْرُفَنَّـو تَمَلِّي بِىۤ نُخْرِيۤنْهِنْ

الشَّرْ دِيمَـه بِتْوَطَّنَّـو بِىۤ خُفِّيۤهنْ

***

ألْبِلْ عَادَه يُـوۤتْ فَارِسَّه يَاكُلْ نَـارُو

مَا بْفَزِّعْهِنْ الفِي كَتْفُو خَاتْ فَـرَّارُو

مِهَاجْرِيهِنْ بِشِيلْ الَلّيۤلْ وبُكْرَه نْهَارُو

مَا بْصُدُّوهُو نُوۤعْ الإنْحَكَر فِي حُمَارُو

***

ألْبِلْ دِيۤلْ لَبَنْهِنْ جُودْ نَصَاحْ ؤضَرَاوَه

ألْبِلْ دِيۤلْ حُوَارْهِنْ عَاتِي مَـا بِتْقَاوَى

إنْقِيبِـنْ دَرَعْ عِقْلاتُو دُوبَى ؤوَاوَى

فَارِسْهِـن تَمَّلِي بِدُقُّو لِيۤهُو بَـرَاوَه

***

ألْبِـلْ دِيـۤـلْ خَيْـرَاتْ جُمْلَــه

ألْبِلْ بَنْكْ بِجْرُدْ لِيۤكَ صَافِي العُمْلَـه

هَيْبَاتْ الرُّجَالْ فِي خِلْقَتِن مُكْتَمْلـَه

رِكِبْهِنْ طَه ابْن قُرِيۤشْ قَايدْ الحَمْلَه

***

ألْبِـل دِيۤـلْ مَا شُفْ فِعْلَهِـنْ يَا فْلانْ

مَا جَدَعَـنْ عَلىۤ دْرُوبِّنْ كَتِيرْ فِرسَانْ

مَا فَتَنَنْ كَتِيـرْ دَمَـرَنْ كَتِيرْ قِيۤمَـانْ

مَا كَتَبَـنْ تَوارِيـخْ مِنْ زَمَنْ عَدْنَانْ

***

شَيَّالات قُرِيۤـشْ زَمَنَـاً بِذُكْــرُو زَمَانْ

ؤقُبَّـالْ العَـرَبْ بِتْغِيـرْ بَهَـا العِجْمَـانْ

النُّـوقْ العَصَافِيـرْ سَايِسَــه النُّعْمَـانْ

ؤأصْلَهَا هَسِّي مَحْفُوظْ نْسَلُو فِي السُّودَانْ

***

عِنْد أوْلادْ شَكِيرْ رِكْبُـوۤهَا نَاسْ حَسَّانْ

عِنْدْ أوْلادْ بَـزَعْ كَالِفَّـه حَـاجْ عُثْمَانْ

عِنْدْ جَـرَّارْ مِشَرِّطَـه بَاجَـة العُرْبَانْ

سَعُوهَا كَوَاهَلة غَنَّى عَليهَا ودْ شَورَانْ

***

سَعُوۤهَا أوْلادْ جَعَلْ فِيهَا الفُحُولَة سُمُانْ

ؤعِنْد أوْلاد رَشِيدْ نَاسْ الصَّبِي الدَّرْهَانْ

أدَرُوۤبْ فِيهَـا شَـمَّر رَاكِبَ أبْ كِيۤعَانْ

ؤتَلْقَى اللّحَوِي رَاكْبَ المَا بِشِيلْ قُرْدَانْ

***

ؤبِيۤ درُوبَه الكَبَابِيشْ كَشَّحُـو الجَبَخَانْ

أوْلادْ هَـوَّارْ فِعِلْـهًنْ فِيهَا مَا وسْخَـانْ

دَارْ حَامِـدْ سَعَاهَـا ؤقَفَّـلْ الدُّكَّــانْ

حَمَرْ سَايِسْهَـا مَا مُحْتَاجَـه لِِىۤ قُطْرَانْ

***

بَرَامْكَتْهَـا المَجَانِيـنْ رَكْبُهُـم فَنَّانْ

مـِنْ دَارْ الرِّزِيۤقَاتْ شَاتَه فِي الوِدْيَانْ

رَتَعَتْ عِـنْ رُفَاعَـه مْكَتِّـرّه الحَنََّانْ

ؤعِنْد أوْلادْ عَرَكْ رَاتْعَه ودِيَارَهَا أمَانْ

***

الحَسَّانِيَّـه فُوۤقْ مَرَقُوۤبْهَا فِي القِيـۤزانْ

ؤمَيْدُوبْ فُوۤق جَزُوهَا مْسَمِّنَه الحِيۤـرَانْ

سَدَرُوۤبْهَـا الجِمِعْ شَالُوا الرُّهَافْ ؤسْنَانْ

أوْلادْ شَنْبُـولْ بِيتْكُـو جَنَاهَا للضِّيۤفَـانْ

***

والشِّويۤحَاتْ لِيۤهَا فِي الخُوۤر وَسَّعُو الحِيۤضَانْ

الزِّيَادِيَّــه رَاعِيـهُنْ بـِـرِفْ عجـلانْ

سَدَارْنَــه ومَسَلَّمِيَّـه ونَاقَـة الحُمْـرَانْ

جَقْلَـه عَزِيـزَه رَتَعَتْ عِنْ عِيَالْ بَطْحَـانْ

***

ألْبِـلْ دِيۤلْ سِعَايَة الفِي العِيَالْ سَمْتَـانْ

دَنَّايَـاتْ بَعِيـدْ سِيدْتِـنْ دَوَامْ طَرْبَـانْ

زَيَّادَاتْ شُعُـورْ الشَّهْمَـة فِي الجِنْيَـانْ

لَبَنْهِـنْ كُلُّـو صَحَّـة وعَافْيَة للمَرْضَانْ

***

مَا تْقُـولْ لَيَّ مَاعِـزْ لا بَقَـرْلا ضَـانْ

هِــنْ أُمَّـاتْ رُقَابْ الشَّكْرَه ويۤنْ مَاكَانْ

لَحَمْهِـنْ صَحَّه لا قَارْدِي وَلا مُصْـرَانْ

زَي لَحَـمَ السَّمَـكْ مَـا بْألِّـمْ البَدْنَـانْ

***

مَا بَسْعَاهَا نـُوۤعْ الحَارِسْ النِّسْـوَانْ

إلا القَلْبُـو قَاطِعْ مـِنْ نَـزَزْ نَشْفَـانْ

البِتـْرَبَّى فِيهَـا بْلاطِـمْ الدِّيـۤۤـدَانْ

ؤفَارِسِّنْ عَنِيـدْ والنَّصْرَه هِيلُو ضَمَانْ

***

وَلَداً شَدّ فَي الكَلَسْ الضُّرَاعُو مَلانْ

زَرَدْ الكُـورْ ؤبِعَـزِفْ رَنَّة الفَنَّـانْ

صَاحْ بِى نََمَّة الرَّادَمْ الوَضِيبْ كِيمَانْ

يَمِينُو جُرُابُو فِيهُو مْدَخِّلْ أبْ قَـرَّانْ

***

جَنَاهُنْ صَاحِي مَا بْتَلقَاهُو يُوۤتْ زَعَلانْ

مَـا الدَّلَمِي البِنِـعْ مِنْ الوَخَمْ فَتْـرَانْ

فحلهن يجيـۤۤك نزّاز دُوۤمْتُـو كالقُطْرَانْ

كَاشْحْ البُنْ عَلى ضَهَرُو ؤوسِط جُوعَانْ

***

لَقْحَتْهِـنْ تَجِيكْ تَرْزِمْ ضَرِعْهَـا مَـلانْ

مَشِيهَا مِنْ الشَّحَمْ عَاصْر التُّرَابْ وَحْلانْ

بيلعب في أُمْ طِرَيۤرِيمَـه الحُـوارْ فَرْحَانْ

يِرُوحْ ؤيْجِيهَا زَي شَافْـع البَدُو الطَّرْبَانْ

***

العَجَبْ العُجَابْ إنْ وَقّفُـو أبْ قَـرَّانْ

بِياخْد العَرْضَه فَايزْ دِيمَه في المِيۤدَانْ

سَافَـرْ للخَلِيجْ شَافْ مُجْمَـل البُلْدَانْ

أخَدْ الكَاسْ ؤرَجَّـحْ كَفَّـة المِيۤـزَانْ

***

صَرَفْ الجَايْـزَه بَالدُّولارْ مَلا الجُـزْلانْ

وإنْ بَاعُو بِجِيبْ حَقْ عَشَره فِي النِّيسَانْ

بِيسْعَى مْـرَاحْ بَقَـرْ تِتْقَانَـتْ التِّيـرَانْ

يِجِيـبْ ضَانَاً يِكَـرِّه بِالـرَعِي الرِّعْيَانْ

***

مَا شُـفْ فِعْلَهِنْ يَا أخِينَا سَاعْة الضِّيقْ

بِيلْفَـنْ سُرْعَـة الوَرْطَانْ ؤلِيۤهُو شَهِيقْ

فَارِسْهِـنْ بِدُخْل الحَـارَّه مَـا لْقِيۤليـقْ

فَحَلْهِنْ نَايْبُو لِى غَارْبْ البِخَاصْمُو يِعِيقْ

***

رِعْيَـــانْ الفُــــرُوعْ الفُـــوۤقْ

مِنُـو البِرْعَاهُو مِنْ غِيۤرْ وَدْ عُزَازْ النّوقْ

يِجِيـكَ يْهُوقِي لَحَّـاقْ البِقُـولَنْ قُـوۤقْ

ظَرَّة كُـورُو تَخَلِـفْ طَنَّـة الغَرْنـُوقْ
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://abza3.montadarabi.com
 
اروع ماقاله شاعر البزعه احمد محمد عبدالرحمن قلباي في البل
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديـــــــــات ابنـــــــــاء البزعــــــــــه :: المنتدي العام :: المنتدى الاجتماعي-
انتقل الى: